ဖီအိုရင်တီးနားနည်းပြ ပီအိုလီ ရာထူးက ထုတ်ပယ်ခံရဖို့ နီးစပ်နေ
ဖီအိုရင်တီးနားအသင်းရဲ့ နည်းပြ ပီအိုလီဟာ စီးရီးအေမှာ ပွဲစဥ်(၁၀) ပြီးတဲ့အထိ နိုင်ပွဲမရသေးတာကြောင့် ရာထူးက ထုတ်ပယ်ခံရဖို့ နီးစပ်နေပြီဖြစ်ကြောင်း သိရပါတယ်။
ဖီအိုရင်တီးနားအသင်းဟာ ကွန်းဖရန့်လိဂ်မှာ ရာနှုန်းပြည့်နိုင်ပွဲ ရထားပေမဲ့ စီးရီးအေမှာတော့ ၄ ပွဲသရေ၊ ၆ ပွဲရှုံးထားပါတယ်။
ပီအိုလီဟာ ၂၀၂၁-၂၂ ရာသီမှာ အေစီမီလန်အသင်းကို စီးရီးအေချန်ပီယံဆု ရယူပေးနိုင်ခဲ့သူဖြစ်ပြီး ဖီအိုရင်တီးနားအသင်းကိုတော့ ဒီနွေမှာ ဒုတိယအကြိမ် တစ်ကျော့ပြန် ကိုင်တွယ်ခဲ့တာပါ။
ဖီအိုရင်တီးနားအသင်းက ၂၀၂၈ ခုနှစ်အထိ စာချုပ်ချုပ်ဆိုထားတဲ့ ပီအိုလီကို စာချုပ်ဖျက်သိမ်းဖို့ ဆွေးနွေးနေပြီး နစ်နာကြေးပေးချေသွားမယ်လို့ သိရပါတယ်။
ဖီအိုရင်တီးနားအသင်းဟာ အစားထိုးဖို့ နည်းပြသစ်ကိုလည်း ရှာဖွေနေပြီဖြစ်ပြီး နည်းပြဟောင်း ပယ်လာဒီနိုနဲ့ တိုရီနိုနည်းပြဟောင်း ဗာနိုလီတို့ထဲက တစ်ဦးဦးကို ခန့်အပ်ဖွယ်ရှိကြောင်း သတင်းထွက်နေပါတယ်။
