ဘာစီလိုနာအသင်းဟာ လာမယ့်နှစ်နွေရာသီမှာ မန်စီးတီးတိုက်စစ်မှူး ဟာလန်းကို ခေါ်ယူဖို့ စိတ်ဝင်စားနေတယ်လို့ သိရပါတယ်။
ဘာစီလိုနာအနေနဲ့ ဘဏ္ဍာရေးအခြေအနေ ဆိုးရွားနေပေမဲ့ ဥက္ကဋ္ဌ လာပေါ်တာက ဟာလန်းကို မျက်စိကျနေတယ်လို့ စပိန်သတင်းတွေက ဖော်ပြခဲ့ပါတယ်။
ဘာစီလိုနာအသင်းတိုက်စစ်မှူး လီဝန်ဒေါစကီးဟာ အခုရာသီကုန်မှာ အသင်းနဲ့ စာချုပ်သက်တမ်း ကုန်ဆုံးမှာပါ။
လီဝန်ဒေါစကီးအနေနဲ့ ဘာစီလိုနာအသင်းမှာ သုံးရာသီ ရှိလာခဲ့ပြီး ၃၇ နှစ်အရွယ် သူ့ကို အသင်းက စာချုပ်သက်တမ်းတိုးဖို့ မရှိပါဘူး။
လက်ရှိမှာ လီဝန်ဒေါစကီး ရာသီကြိုဒဏ်ရာကနေ ပြန်ကောင်းလာပေမဲ့ နည်းပြ ဟန်ဆီဖလစ်ခ်က သူ့ကို အကန့်အသတ်နဲ့သာ အသုံးပြုနေပါတယ်။
အခြားတိုက်စစ်မှူးအဖြစ် ဖယ်ရန်တောရက်စ် ရှိနေပေမဲ့ အထောင်တိုက်စစ်နေရာမှာ ပုံမှန်ဦးဆောင်နိုင်ပါ့မလားဆိုတာ ဘာစီလိုနာဘုတ်အဖွဲ့က သံသယရှိနေပါတယ်။
ဒါကြောင့် ဥက္ကဋ္ဌ လာပေါ်တာနဲ့ အားကစားဒါရိုက်တာ ဒေကိုတို့က လာမယ့်နှစ်နွေရာသီမှာ အထောင်တိုက်စစ်မှူးတစ်ဦးခေါ်ယူဖို့ ဆုံးဖြတ်ခဲ့ပါတယ်။
စပိန်မီဒီယာ El Nacional က ဘာစီလိုနာအသင်းဟာ အက်သလက်တီကိုအသင်းက မန်စီးတီးကစားသမားဟောင်း အယ်လ်ဗာရက်ဇ်ကို ခေါ်ယူဖို့ အသင်းတွင်း ဆွေးနွေးခဲ့တယ်လို့ သိရပါတယ်။
ဒါပေမဲ့ လာပေါ်တာကတော့ ဟာလန်းအပေါ်မှာပဲ အဓိကအာရုံစိုက်နေတယ်လို့ ယင်းသတင်းက ရေးသားခဲ့ပါတယ်။
အသက် ၂၄ နှစ်အရွယ် ဟာလန်းဟာ ပြီးခဲ့တဲ့ဇန်နဝါလကမှ အသင်းနဲ့ ၂၀၃၄ ခုနှစ်အထိ စာချုပ်သက်တမ်းတိုးထားခဲ့တာပါ။
ဟာလန်းအနေနဲ့ မန်စီးတီးအသင်းမှာ တစ်ပတ် ပေါင် လေးသိန်းဝန်းကျင် ရရှိနေတယ်လို့ သိရပါတယ်။
