ဘရိုက်တန်နဲ့ပွဲကို ဆာလီဘာနဲ့ မာတင်နယ်လီ လွဲချော်မယ်လို့ အာတေတာ အတည်ပြုခဲ့ပြီး ပွဲထွက်စာရင်းကို အပြောင်းအလဲများစွာ ပြုလုပ်ဖွယ်ရှိ
အာဆင်နယ်အသင်းရဲ့နည်းပြ အာတေတာက ဒီနေ့ည ဘရိုက်တန်အသင်းနဲ့ ယှဉ်ပြိုင်ကစားမယ့် လိဂ်ဖလားစတုတ္ထအဆင့်ပွဲစဉ်ကို ပြင်သစ်နောက်ခံလူ ဆာလီဘာနဲ့ ဘရာဇီးလ်တိုက်စစ်ကစားသမား မာတင်နယ်လီတို့ လွဲချော်မယ်လို့ အတည်ပြုပြောကြားခဲ့ပါတယ်။
ဒီကစားသမားနှစ်ဦးဟာ ခရစ္စတယ်ပဲလေ့စ်အသင်းနဲ့ ယှဉ်ပြိုင်ခဲ့တဲ့ ပရီးမီးယားလိဂ်ပွဲမှာ ဒဏ်ရာပြဿနာတွေနဲ့ ရင်ဆိုင်ခဲ့ရတာဖြစ်ပြီး လာမယ့် ဝက်စ်ဟမ်းနဲ့ပွဲမှာမှ ပြန်ကစားနိုင်ဖွယ်ရှိကြောင်း သိရပါတယ်။
အာတေတာက ဒက်ကလန်ရိုက်စ်၊ ဆာကာနဲ့ ကာလာဖီအိုရီတို့ကတော့ ဘရိုက်တန်နဲ့ပွဲမှာ ပါဝင်ကစားဖို့ အသင့်ဖြစ်နေကြောင်း ပြောကြားခဲ့ပေမဲ့ ပွဲထွက်စာရင်းကို အပြောင်းအလဲများစွာ ပြုလုပ်ဖွယ်ရှိနေကြောင်း ထင်ကြေးပေးမှုတွေ ရှိနေပါတယ်။
အသင်းအနေနဲ့ ပြိုင်ပွဲမျိုးစုံ ဆက်တိုက်ယှဉ်ပြိုင်နေရတာကြောင့် အာတေတာက အဓိကကစားသမားတွေကို အနားပေးပြီး အရန်ကစားသမားတွေကို အသုံးပြုဖွယ်ရှိကြောင်း ထင်ကြေးပေးနေကြတာပါ။
ဒါကြောင့် ဂိုးသမား ကယ်ပါနဲ့အတူ ခံစစ်မှာ ဘင်ဝှိုက်၊ မော့စ်ကွယ်ရာ၊ စကယ်လေ၊ ဟင်ကာပီတို့ ပွဲထွက်ကစားခွင့်ရနိုင်ဖွယ်ရှိကြောင်းနဲ့ တိုက်စစ်မှာ ယိုကယ်ရက်စ်အစား မယ်ရီနိုကို အသုံးပြုဖွယ်ရှိကြောင်း၊ ဆယ်ကျော်သက်ကစားသမား မက်စ်ဒေါင်းနင်းလည်း အရန်စာရင်းမှာ ပါဝင်လာနိုင်ကြောင်း လန်ဒန်အခြေစိုက်မီဒီယာတွေက သုံးသပ်ဖော်ပြခဲ့ကြပါတယ်။
