မန်စီးတီးအသင်းရဲ့နည်းပြ ဂွါဒီယိုလာက အက်သလက်တီကိုအသင်းကို ပြောင်းရွှေ့သွားခဲ့တဲ့ အာဂျင်တီးနားတိုက်စစ်မှူး အယ်လ်ဗာရက်ဇ်ကို မန်စီးတီးအသင်းမှာ ရှိစေချင်တယ်လို ပြောကြားခဲ့ပါတယ်။
အယ်လ်ဗာရက်ဇ်(၂၅ နှစ်)ဟာ မန်စီးတီးအသင်းနဲ့အတူ ဖလားသုံးလုံးအောင်ပွဲ ရယူနိုင်ခဲ့သူဖြစ်ပြီး ပွဲကစားခွင့်ပိုရချင်တာကြောင့် ၂၀၂၄ နွေရာသီမှာ အက်သလက်တီကိုအသင်းကို ယူရို(၉၅)သန်းနဲ့ ပြောင်းရွှေ့သွားခဲ့တာပါ။
အယ်လ်ဗာရက်ဇ်ဟာ အက်သလက်တီကိုအသင်းမှာလည်း ခြေစွမ်းပြနေတာကြောင့် ဂွါဒီယိုလာက လက်မလွှတ်ချင်ဘဲ လွှတ်လိုက်ရတာဖြစ်ကြောင်း ပြောကြားခဲ့တာပါ။
”ကျွန်တော်တို ဖလားသုံးလုံးရခဲ့တုန်းက အရန်ခုံထိုင်ခဲ့ရတဲ့ကစားသမားတွေကို မှတ်မိသေးလား။ လာပေါ်တေးက အရမ်းကောင်းတဲ့ နောက်ခံလူတစ်ယောက်ဖြစ်ပြီး လက်ရွေးစင်အသင်းမှာ ပုံမှန်နေရာရနေသူပါ။ ပြီးတော့ ဂျူလီယန်(အယ်လ်ဗာရက်ဇ်)နဲ့ တခြားကစားသမားတွေကလည်း ကျွန်တော် အသင်းမှာ ရှိစေချင်သူတွေပါ။ ဒါပေမဲ့ သူတိုက ပွဲကစားခွင့်ပိုရချင်တာကြောင့် ထွက်ခွာသွားကြပါတယ်။ ဂျူလီယန်က အာလင်းနဲ့ ပြိုင်ဆိုင်ခဲ့ရပြီး ကျွန်တော်တိုအတွက် အပိုစွမ်းအားတွေ ဖြစ်ခဲ့ပါတယ်။ သူက အခု ကမ္ဘာ့အကောင်းဆုံးအသင်းတစ်သင်းဖြစ်တဲ့ အက်သလက်တီကိုမှာ ကမ္ဘာ့အဆင့်နည်းပြ ဆီမြွန်နီနဲ့အတူ စွမ်းဆောင်ရည်ကောင်း ပြသနေပါတယ်။ သူ့ကို အသင်းမှာ ရှိစေချင်ပေမဲ့ နားလည်ပါတယ်” လို ဂွါဒီယိုလာက ပြောကြားခဲ့ပါတယ်။
အယ်လ်ဗာရက်ဇ်ဟာ အက်သလက်တီကိုအသင်းအတွက် (၆၆)ပွဲကစားပြီး (၃၆)ဂိုး သွင်းယူပေးထားကြောင်း သိရပါတယ်။
