အာဆင်နယ်အသင်းခေါင်းဆောင် အော်ဒီဂွါရဲ့ဒူးဒဏ်ရာအခြေအနေ စိုးရိမ်ရ
အာဆင်နယ်အသင်းနည်းပြ အာတေတာက ဝက်စ်ဟမ်းကို (၂-ဝ)ဂိုးနဲ့ အနိုင်ရတဲ့ပွဲမှာ ဒူးဒဏ်ရာရခဲ့တဲ့ အသင်းခေါင်းဆောင် အော်ဒီဂွါရဲ့ဒဏ်ရာအခြေအနေစိုးရိမ်ရတယ်လို့ ဝန်ခံခဲ့ပါတယ်။
အော်ဒီဂွါဟာ ဝက်စ်ဟမ်းကစားသမား ဆမ်မာဗေးလ်နဲ့ ထိခိုက်မိပြီး ဘယ်ဘက်ဒူးဒဏ်ရာ ရခဲ့ကာ ၃၀ မိနစ်မှာ လူစားလဲခံခဲ့ရပါတယ်။
၎င်းဟာ ပရီးမီးယားလိဂ်သမိုင်းမှာ ပွဲထွက်ကစားခွင့်ရတဲ့ သုံးပွဲဆက်တိုက် ပထမပိုင်းမပြီးခင် လူစားလဲခံရတဲ့ ပထမဆုံးကစားသမားလည်း ဖြစ်လာခဲ့တယ်။
ပြီးခဲ့တဲ့ လိဒ်စ်၊ နော်တင်ဟမ်အသင်းတို့နဲ့ ပွဲတွေမှာ လူစားလဲခံရတာက ပခုံးဒဏ်ရာကြောင့် ဖြစ်ပါတယ်။
”သူဟာ ဒူးချင်းထိခိုက်မိခဲ့တယ်လို့ ကျွန်တော် ယူဆပါတယ်။ ချက်ချင်းပဲ သက်သောင့်သက်သာ မရှိတော့ပါဘူး။ ကျွန်တော် သူနဲ့ စကားပြောခဲ့ပြီး သူ့ဒဏ်ရာက အခြေအနေ မကောင်းပါဘူး။ ဆရာဝန်တွေထံက အဖြေကို ကျွန်တော်တို့ စောင့်ရမယ်။ ဒါပေမဲ့ ကျွန်တော်တို့ ဒီအတွက် ကံအတော်မကောင်းခဲ့တာပါ”လို့ အာတေတာက ပြောခဲ့ပါတယ်။
အာတေတာဟာ အခုပွဲမှာ အာဆင်နယ်အသင်းကို ကိုင်တွယ်မှု ပွဲ ၃၀၀ ပြည့်ခဲ့ပြီး နိုင်ပွဲ ၁၇၇ ပွဲ ရှိခဲ့ပါတယ်။
