လီဗာပူးလ်အသင်းမှာ အားနည်းချက်တွေ ရှိနေတယ်လို့ အာနယ်ဆလော့ ဝန်ခံ
ပရီးမီးယားလိဂ် လက်ရှိချန်ပီယံ လီဗာပူးလ်အသင်းနည်းပြ အာနယ်ဆလော့က ချယ်လ်ဆီးကို ၁-၂ ဂိုးနဲ့ အရေးနိမ့်ပြီးနောက် သူ့အသင်းမှာ အားနည်းချက်တွေ ရှိနေတယ်လို့ ဝန်ခံခဲ့ပါတယ်။
ဒါ့အပြင် ၎င်းက ကံကြမ္မာအပေါ်မှာပဲ အားကိုးနေလို့ မရကြောင်းလည်း သုံးသပ်ခဲ့ပါတယ်။
လီဗာပူးလ်အသင်းဟာ ပရီးမီးယားလိဂ် နှစ်ပွဲဆက်အပါအဝင် ပြိုင်ပွဲစုံ သုံးပွဲဆက်တိုက် ရှုံးပွဲတွေ့ခဲ့ပါတယ်။
အာနယ်ဆလော့ဟာ လီဗာပူးလ်နည်းပြဘဝမှာ ပထမဆုံးအကြိမ် သုံးပွဲဆက်တိုက် အရေးနိမ့်ခဲ့တာပါ။
ဒါ့အပြင် အမှတ်ပေးဇယား ထိပ်ဆုံးနေရာကိုလည်း မဟာပြိုင်ဘက် အာဆင်နယ်အသင်းထံ လွှဲပြောင်းပေးခဲ့ရပါတယ်။
လီဗာပူးလ်အနေနဲ့ အစောပိုင်း ပရီးမီးယားလိဂ်ပွဲတွေမှာ နောက်ကျဂိုးတွေနဲ့ အနိုင်ယူခဲ့ကြပေမဲ့ အခုနောက်ဆုံး နှစ်ပွဲဆက် နာကျင်အချိန်ပိုမှာ အနိုင်ဂိုး ပေးခဲ့ရပါတယ်။
