အောက်တိုဘာလအတွက် မေဂျာလိဂ်အကောင်းဆုံးကစားသမားဆုကို မက်ဆီ ရရှိ
အင်တာမိုင်ယာမီအသင်းခေါင်းဆောင် တိုက်စစ်မှူး မက်ဆီဟာ အောက်တိုဘာလအတွက် မေဂျာလိဂ်အကောင်းဆုံးကစားသမားဆု ရရှိခဲ့ကြောင်း သိရပါတယ်။
မက်ဆီဟာ အောက်တိုဘာလအတွင်း ယှဉ်ပြိုင်ကစားခဲ့တဲ့ မေဂျာလိဂ်(၃)ပွဲမှာ ကိုယ်တိုင်(၅)ဂိုးသွင်းပြီး (၅)ဂိုးဖန်တီးပေးခဲ့တာကြောင့် အကောင်းဆုံးကစားသမားဆု ရရှိခဲ့ခြင်းဖြစ်ပါတယ်။
မက်ဆီအနေနဲ့ လအလိုက်အကောင်းဆုံးကစားသမားဆုကို ဒီရာသီအတွင်း (၃)ကြိမ်မြောက်(မေ၊ ဇူလိုင်၊ အောက်တိုဘာ)ရရှိခဲ့တာဖြစ်ပြီး အင်တာမိုင်ယာမီမှာ ကစားခဲ့တဲ့သက်တမ်းအတွင်းဆိုရင်တော့ (၅)ကြိမ်မြောက်ရရှိခြင်းဖြစ်ကြောင်း သိရပါတယ်။
မက်ဆီဟာ ၂၀၂၅ ရာသီ မေဂျာလိဂ်ပြိုင်ပွဲရဲ့ ဂိုးသွင်းအများဆုံးကစားသမားဆုကို (၂၉)ဂိုးနဲ့ ရယူနိုင်ခဲ့ပြီဖြစ်သလို၊ အကောင်းဆုံးကစားသမားဆုကို နှစ်ရာသီဆက်တိုက်ရရှိဖို့လည်း အလားအလာကောင်းနေပါတယ်။
အင်တာမိုင်ယာမီအသင်းက မကြာခင်စာချုပ်သက်တမ်းကုန်တော့မယ့် မက်ဆီကို သက်တမ်းတိုးစာချုပ်ချုပ်ဆိုဖို့ ကြိုးပမ်းနေကြောင်း သိရပါတယ်။
