မန်ယူအသင်းရဲ့နည်းပြ အာမိုရင်မ်က အသင်းအနေနဲ့ တိုးတက်မှုရှိဖို့ လိုအပ်နေတယ်လို့ ဖူလ်ဟမ်နဲ့ သရေကျတဲ့ပွဲအပြီးမှာ ပြောကြားခဲ့ပါတယ်။
မန်ယူအသင်းဟာ ပရီးမီးယားလိဂ်အဖွင့်ပွဲမှာ အာဆင်နယ်ကို ရှုံးနိမ့်ခဲ့ပြီး ဒုတိယပွဲမှာ ဖူလ်ဟမ်နဲ့ သရေကျခဲ့တာပါ။
ဒါကြောင့် အာမိုရင်မ်အနေနဲ့ မန်ယူအသင်းကို ကိုင်တွယ်ခဲ့တဲ့ ပရီးမီးယားလိဂ်(၂၉)ပွဲမှာ (၂၈)မှတ်သာ ရယူနိုင်ခဲ့ကြောင်းလည်း သိရပါတယ်။
”ကျွန်တော်တို့ ဂိုးသွင်းပြီးတဲ့နောက်မှာ ဘယ်လိုကစားနေသလဲဆိုတာ မေ့သွားတယ်လို့ ကျွန်တော် ထင်ပါတယ်။ ကွင်းထဲမှာရှိတဲ့လူတိုင်းက အခွင့်အရေးကို ဆုပ်ကိုင်ပြီး အနိုင်ရလဒ်ကို ထိန်းသိမ်းဖို့ ကြိုးစားခဲ့ပါတယ်။ ကျွန်တော့်အမြင်ကတော့ အဲဒီအခိုက်အတန့်မှာ သက်သောင့်သက်သာနဲ့ ပြိုင်ဘက်ကို ဖိအားပေးကစားရမှာပါ။ ကျွန်တော်တို့က ပြင်းပြင်းထန်ထန်ဖိကစားဖို့ ကြိုးစားခဲ့လို့ နေရာလွတ်အများကြီးဖြစ်ခဲ့ပါတယ်။ ကျွန်တော်တို့ တိုးတက်မှုရှိဖို့ အများကြီးလိုအပ်နေပါတယ်” လို့ ပြောကြားခဲ့ပါတယ်။
မန်ယူအသင်းဟာ သြဂုတ်(၂၇)ရက်နေ့မှာ Grimsby Town အသင်းနဲ့ လိဂ်ဖလားဒုတိယအဆင့်ပွဲစဉ် ယှဉ်ပြိုင်ကစားရဖို့ ရှိနေပြီး လာမယ့်ပရီးမီးယားလိဂ်ပွဲစဉ်(၃)မှာတော့ ဘန်လေနဲ့ ရင်ဆိုင်ရမှာပါ။
