စပါးအသင်းဟာ ရီးယဲလ်အသင်းက ဘရာဇီးလ်တိုက်စစ်ကစားသမား ရိုဒရီဂိုကို ယူရို(၆၅)သန်းနဲ့ ကမ်းလှမ်းလိုက်ကြောင်း သိရပါတယ်။
ရီးယဲလ်အသင်းကို ၂၀၁၉ ခုနှစ်ကတည်းက ရောက်ရှိခဲ့တဲ့ ရိုဒရီဂိုဟာ အသင်းမှာ ခြေစွမ်းပြနိုင်တဲ့ ကစားသမားတစ်ဦးဖြစ်ပေမဲ့ နည်းပြသစ် အလွန်ဆို သဘောမကျတာကြောင့် ပွဲကစားခွင့်ရနိုင်ခြေ နည်းပါးနေပါတယ်။
ရိုဒရီဂိုက ရီးယဲလ်အသင်းမှာပဲ ဆက်နေပြီး နေရာလုတိုက်ပွဲ ဆင်နွှဲချင်နေပေမဲ့ အလွန်ဆိုက ထိပ်တန်းအဆင့် နောက်ခံလူတစ်ဦး အားဖြည့်ချင်နေတာကြောင့် ရိုဒရီဂိုကို ရောင်းထုတ်ပြီး အပြောင်းအရွှေ့အသုံးစရိတ် ရှာဖွေဖို့ လိုလားနေကြောင်း သိရပါတယ်။
စပါးအသင်းက ၀ါရင့်တိုက်စစ်ကစားသမား ဆွန်ဟောင်မင်ကို ဆုံးရှုံးထားရတော့မှာဖြစ်လို့ ရိုဒရီဂိုကို ခေါ်ယူအစားထိုးဖို့ ရည်ရွယ်နေတာဖြစ်ပြီး ရိုဒရီဂိုနဲ့ တိုက်ရိုက်ဆွေးနွေးညှိနှိုင်းခွင့်ပြုဖို့ ရီးယဲလ်အသင်းကို တောင်းဆိုထားကြောင်းလည်း သိရပါတယ်။
စပါးအသင်းက ရိုဒရီဂိုကို မခေါ်ယူနိုင်ခဲ့ရင် ရာဖေးလ်လီယာအို၊ မူအာနီနဲ့ အန်ဒီယေးတို့ထဲက တစ်ဦးဦးကို ခေါ်ယူဖို့ ချိန်ရွယ်နေကြောင်းလည်း သိရပါတယ်။
