လီဗာပူးလ်တိုက်စစ်မှူးဟောင်း ဆီဆေးက ပြင်သစ်တိုက်စစ်မှူး အီကီတိုက်အနေနဲ့ လီဗာပူးလ်အသင်းမှာ ခြေစွမ်းပြနိုင်မယ်လို့ သုံးသပ်ပြောကြားခဲ့ပါတယ်။
အခုနွေမှာ ငွေကြေးမြောက်မြားစွာ အသုံးပြုကာ အသင်းကို အင်အားဖြည့်တင်းမှုတွေ ပြုလုပ်နေတဲ့ ပရီးမီးယားလိဂ်ချန်ပီယံ လီဗာပူးလ်အသင်းဟာ ဖရန့်ဖတ်အသင်းက ပြင်သစ်တိုက်စစ်မှူး အီကီတိုက်ကို ကနဦးပြောင်းရွှေ့ကြေး ပေါင် (၆၉) သန်းအပြင် Add-ons ကြေး ပေါင် (၁၀) သန်းနဲ့ ခေါ်ယူခဲ့ပြီး (၆) နှစ်သက်တမ်းရှိ စာချုပ်တစ်ရပ် ချုပ်ဆိုခဲ့ပါတယ်။
အီကီတိုက်ဟာ ပြီးခဲ့တဲ့ ၂၀၂၄-၂၅ ရာသီက ဖရန့်ဖတ်အသင်းအတွက် ပြိုင်ပွဲစုံ (၄၈) ပွဲမှာ (၂၂) ဂိုးသွင်းကာ ဂိုးဖန်တီးမှု (၁၂) ကြိမ် ပြုလုပ်ပေးခဲ့တာပါ။
ဒါကြောင့် ဆီဆေးဟာ အီကီတိုက်အနေနဲ့ လီဗာပူးလ်အသင်းမှာ ခြေစွမ်းပြနိုင်တယ်လို့ သုံးသပ်ခဲ့တာဖြစ်ပြီး ပရီးမီးယားလိဂ်မှာ အသားကျဖို့တော့ အချိန်ယူရနိုင်တယ်လို့ ပြောကြားခဲ့တာပါ။
ဆီဆေးက “အီကီတိုက်အနေနဲ့ လီဗာပူးလ်အသင်းနဲ့ ကစားဟန်နဲ့ အံဝင်မယ်လို့ ထင်ပါတယ်။ သူဟာ အထောင်တိုက်စစ်မှူးအဖြစ် ကစားတာပါ။ လီဗာပူးလ်နည်းပြ အာနယ်ဆလော့အနေနဲ့ အီကီတိုက်ကို အကောင်းဆုံးဖြစ်အောင် ကိုင်တွယ်နိုင်စွမ်းရှိတယ်လို့ ယုံကြည်ပါတယ်။ ဒါပေမဲ့ လီဗာပူးလ်အသင်းတိုက်စစ်မှာ ဆာလာတို့လို နာမည်ကျော်တွေ ရှိတာကြောင့် အီကီတိုက်အနေနဲ့ ချက်ချင်းပွဲထွက်ခွင့်ရဖို့တော့ ရုန်းကန်ရနိုင်ပါတယ်။ ပြီးတော့ သူ့အနေနဲ့ ခန္ဓာကိုယ်ကြံ့ခိုင်မှုကို အားပြုပြီး ပြင်းအားမြင့်တဲ့ ပရီးမီးယားလိဂ်မှာ အသားကျဖို့လည်း အချိန်ယူရနိုင်ပါတယ်”လို့ ပြောကြားခဲ့တာပါ။
လီဗာပူးလ်အသင်းဟာ အခုနွေမှာ ဖရင်ပေါင်၊ ဖလော်ရီယန်ဗက်ဇ်၊ ကာကက်ဇ်၊ အီကီတိုက်တို့အပါအဝင် ကစားသမား (၇)ဦးကို ပေါင်သန်း (၃၀၀) နီးပါး အသုံးပြုပြီး ခေါ်ယူထားပေမဲ့ ကစားသမားသစ်တွေ ထပ်မံခေါ်ယူဖို့ လုပ်ဆောင်နေဆဲဖြစ်ကြောင်း ဗြိတိန်မီဒီယာတွေက ဖော်ပြနေကြပါတယ်။
