အာမန် စာရူခ်ယန်က သူ့ကို ချန်ပီယံခါးပတ်လုဖို့ အခွင့်အရေးမပေးတဲ့ အီလီယာ တိုပူရီယာကို ပြန်လည်တုံ့ပြန်လိုက်ပါတယ်။ သူက UFC lightweight ချန်ပီယံခါးပတ်ကို လိုချင်ပြီး၊ အီလီယာ တိုပူရီယာကို ထိုးသည်ဖြစ်စေ၊ မထိုးသည်ဖြစ်စေ ဒီခါးပတ်ကို ရအောင်ယူမယ်လို့ ဆိုပါတယ်။
လွန်ခဲ့တဲ့ ခြောက်လက စာရူခ်ယန်ဟာ UFC 311 မှာ အဲ့ဒီအချိန်က ချန်ပီယံ အစ္စလမ် မာခါချက်ဗ်နဲ့ 155 ပေါင်တန်း ချန်ပီယံခါးပတ်အတွက် ယှဉ်ပြိုင်ဖို့ စီစဉ်ထားခဲ့ပါတယ်။ ဒါပေမဲ့ ပွဲမထိုးခင် တစ်ရက်အလိုမှာပဲ စာရူခ်ယန် ကျောမှာ ဒဏ်ရာရခဲ့တာကြောင့် ပင်မပွဲစဉ်ကနေ နုတ်ထွက်ခဲ့ရပါတယ်။ အဲ့ဒီနောက်ပိုင်း အများကြီး ပြောင်းလဲသွားခဲ့ပါတယ်။ မာခါချက်ဗ်က welterweight ကို တန်းပြောင်းဖို့ ချန်ပီယံခါးပတ်ကို စွန့်လွှတ်ခဲ့ပြီး၊ တိုပူရီယာက UFC 317 မှာ ချားလ်စ် အိုလီဗီယာကို အလဲထိုးပြီး အလွတ်ဖြစ်နေတဲ့ ချန်ပီယံခါးပတ်ကို ရယူခဲ့ပါတယ်။ စာရူခ်ယန်ရဲ့ နောက်ထပ်ပွဲစဉ်ကတော့ ဘယ်သူနဲ့ ဖြစ်မလဲဆိုတာ မသဲကွဲသေးပါဘူး။
မကြာသေးခင်က တိုပူရီယာဟာ Nelk Boys နဲ့ တိုက်ရိုက်ထုတ်လွှင့်မှုတစ်ခုမှာ စာရူခ်ယန်ကို ဘယ်တော့မှ အခွင့်အရေးပေးမှာ မဟုတ်ဘူးလို့ ပြောခဲ့ပါတယ်။ စာရူခ်ယန်က နံပါတ် ၁ ပြိုင်ဘက်နေရာကို ရဖို့အတွက် ထပ်ပြီး မထိုးဘူးဆိုရင် သူ့ခါးပတ်ကို UFC က ယူသွားသင့်တယ်လို့လည်း သူက ထပ်ပြောခဲ့ပါတယ်။ စာရူခ်ယန်က သူတို့ပွဲအတွက် တကယ်လာမှာလားဆိုတာကို မယုံကြည်လို့ စိုးရိမ်ကြောင်းလည်း တိုပူရီယာက ထုတ်ဖော်ပြောဆိုခဲ့ပါတယ်။
တိုပူရီယာရဲ့ မှတ်ချက်ကို စာရူခ်ယန်က တွစ်တာမှာ ချက်ချင်း ပြန်လည်တုံ့ပြန်ခဲ့ပါတယ်။ “ကိုယ့်ကိုကိုယ် ချန်ပီယံလို့ ခေါ်နေပေမယ့် အခုကတည်းက လွတ်မြောက်ဖို့ နည်းလမ်းရှာနေတာကို စဉ်းစားကြည့်ပါ။ မင်း ခါးပတ်ကို စွန့်လို့ရတယ်၊ ဒါမှမဟုတ် ငါယူမယ်။ ဘယ်လိုပဲဖြစ်ဖြစ် အဲဒါ ငါ့ဟာပဲ” လို့ စာရူခ်ယန်က ပိုင်ပိုင်နိုင်နိုင် ရေးသားခဲ့ပါတယ်။
