နာမည်ကျော် ဘရာဇီးလ်တိုက်စစ်ကစားသမား နေမာဟာ ပြင်သစ်လိဂ်မှာ ပြန်လည်ပြောင်းရွှေ့ကစားဖွယ်ရှိနေတယ်လို့ သတင်းထွက်လာပါတယ်။
နေမာဟာ လက်ရှိအချိန်မှာ ငယ်ဘဝအသင်းဟောင်းဖြစ်တဲ့ ဘရာဇီးလ်ကလပ် ဆန်းတို့စ်အသင်းမှာ ကစားနေသူဖြစ်ပြီး ၂၀၂၆ ကမ္ဘာ့ဖလားပြိုင်ပွဲမတိုင်ခင် ဥရောပမှာ ပြန်ကစားဖို့ ဆန္ဒရှိနေခြင်းဖြစ်ကြောင်း သိရပါတယ်။
နေမာ(၃၃ နှစ်)က ဘရာဇီးလ်မှာ ဆက်ကစားနေရင် ၂၀၂၆ ကမ္ဘာ့ဖလားပြိုင်ပွဲမှာ ယှဉ်ပြိုင်ခွင့်ရဖို့ လုံလောက်မှုမရှိနိုင်ဘူးလို့ ယူဆတာကြောင့် ဥရောပမှာ ပြန်ကစားဖို့ ချိန်ရွယ်နေခြင်းဖြစ်ပြီး သူ့ကို စပိန်နဲ့ တူရကီက ကလပ်အသင်းတွေနဲ့အတူ ပြင်သစ်လိဂ်က မာဆေးလ်အသင်းက ခေါ်ယူဖို့ စိတ်ဝင်စားနေတယ်လို့ သိရပါတယ်။
နေမာက PSG အသင်းနဲ့အတူ ပြင်သစ်လိဂ်မှာ (၆)ရာသီကြာ ကျင်လည်ခဲ့ဖူးသူဖြစ်တာကြောင့် မာဆေးလ်အသင်းကို ပြောင်းရွှေ့ကစားဖို့ လိုလားနေတယ်လို့ သိရပါတယ်။
နေမာဟာ ဆန်းတို့စ်အသင်းမှာ ခြေစွမ်းပြနိုင်ပေမဲ့ ဒဏ်ရာပြဿနာရဲ့ ထိုးနှက်မှုနဲ့ ရင်ဆိုင်နေရဆဲဖြစ်တာကြောင့် ပရိသတ်တချို့ကတော့ စိတ်ပျက်နေကြပါတယ်။
