လက်ရှိအချိန်မှာ အကောင်းဆုံးပုံစံ ရရှိနေတယ်လို့ ဟာလန်း ကြုံးဝါး
မန်စီးတီးအသင်းရဲ့ နော်ဝေတိုက်စစ်မှူး ဟာလန်းက လက်ရှိအချိန်မှာ ကစားသမားဘဝတစ်လျှောက် အကောင်းဆုံးပုံစံ ရရှိနေတယ်လို့ ကြုံးဝါးပြောကြားခဲ့ပါတယ်။
ဟာလန်းဟာ ဒီရာသီမှာ မန်စီးတီးအသင်းအတွက် (၉)ပွဲမှာ (၁၂)ဂိုး သွင်းယူထားသလို၊ နော်ဝေအသင်းအတွက် (၂)ပွဲမှာ (၆)ဂိုး သွင်းယူထားတာကြောင့် ပြိုင်ပွဲစုံ(၁၁)ပွဲမှာ (၁၈)ဂိုးအထိ သွင်းယူထားနိုင်ပါတယ်။
ဟာလန်းအနေနဲ့ စပါးအသင်းကို ရှုံးနိမ့်ခဲ့တဲ့ ပရီးမီးယားလိဂ်ပွဲမှာသာ ဂိုးမသွင်းနိုင်ခဲ့တာဖြစ်ပြီး ကျန်ပွဲအားလုံးမှာ ဂိုးသွင်းနိုင်ခဲ့တာပါ။
ကလပ်အသင်းနဲ့ လက်ရွေးစင်အသင်း နှစ်မျိုးပေါင်းအတွက် (၉)ပွဲဆက်တိုက် ဂိုးသွင်းယူနိုင်ခဲ့ခြင်းက ဟာလန်းရဲ့ ကစားသမားဘဝမှာ ပွဲဆက်အများဆုံးဂိုးသွင်းမှတ်တမ်းဖြစ်နေကြောင်းလည်း သိရပါတယ်။
”အခု လုပ်နိုင်တာထက် ပိုကောင်းအောင် လုပ်နိုင်ခဲ့တယ်လို့ ကျွန်တော် ဘယ်တုန်းကမှ မခံစားခဲ့ရဖူးပါဘူး။ ပထမဆုံးအချက်က ပွဲကစားဖို့ အသင့်ဖြစ်နေအောင် ပြင်ဆင်နိုင်မှုကြောင့်ဖြစ်လိမ့်မယ်လို့ ကျွန်တော် ထင်ပါတယ်။ ခင်ဗျားအနေနဲ့ ရုပ်ပိုင်းဆိုင်ရာအရ အသင့်ဖြစ်နိုင်ပေမဲ့ စိတ်ပိုင်းဆိုင်ရာအရလည်း ကောင်းမွန်နေဖို့ လိုပါတယ်။ အရိုးသားဆုံးပြောရင် ကလေးတစ်ယောက် ရှိလာတာကလည်း ကျွန်တော့်ကို ပိုကောင်းစေပါတယ်။ ကျွန်တော် ဘောလုံးအကြောင်း အချိန်တိုင်းမတွေးဖြစ်တော့ပါဘူး” လို့ ဟာလန်းက သုံးသပ်ပြောကြားခဲ့ပါတယ်။
