နော်ဝေလက်ရွေးစင်တိုက်စစ်မှူး ဟာလန်းဟာ စက်တင်ဘာလအတွင်းကစားရမယ့် ခြေစမ်းပွဲနဲ့ ကမ္ဘာ့ဖလားခြေစစ်ပွဲမှာ ဘရက်ဟာလန်းအဖြစ် နာမည်ပြောင်းလဲ ဝတ်ဆင်မယ်လို့ သိရပါတယ်။
အသက် ၂၅ နှစ်ရှိပြီဖြစ်တဲ့ ဟာလန်းရဲ့ နာမည်အပြည့်အစုံက အာလင်းဘရက်ဟာလန်းဖြစ်ပြီး ယခင်ဝတ်ဆင်ခဲ့တဲ့ ဂျာစီတွေမှာတော့ ”ဟာလန်း” အမည်ကိုသာ အသုံးပြုခဲ့တာပါ။
ဒါပေမဲ့ စက်တင်ဘာလအတွင်း နော်ဝေလက်ရွေးစင်အသင်းယှဉ်ပြိုင်ရမယ့် နိုင်ငံတကာပွဲစဉ်တွေမှာ အလယ်နာမည်ကိုပါထည့်သွင်းပြီး ”ဘရက်ဟာလန်း” လို့ ရေးသားထားတဲ့အကျႌ ပြောင်းလဲဝတ်ဆင်ဖို့ ဆုံးဖြတ်ခဲ့တာဖြစ်ပါတယ်။
ယခုလို ဟာလန်း နာမည်ပြောင်းလဲဝတ်ဆင်မယ့် ဆုံးဖြတ်ချက်နဲ့ ပတ်သက်ပြီး နော်ဝေအသင်းနည်းပြ ဆိုလ်ဘက်ကန်က ”အဲဒါ (ဘရက်) က သူ့နာမည်ပါ။ ဒါက ခက်ခဲတဲ့ကိစ္စတော့ မဟုတ်ပါဘူး။ ဒီကိစ္စနဲ့ပတ်သက်ပြီး ကျွန်တော်လည်း အခုချိန်အထိမသိသေးပါဘူး” လို့ ပြောကြားခဲ့ပါတယ်။
ဟာလန်းဟာ အင်္ဂလန်နိုင်ငံမှာ မွေးဖွားခဲ့ပေမဲ့ ဖခင်ဖြစ်သူ အဲလ်ဖ်အင့်ချ်ဟာလန်းရဲ့ အမွေကိုဆက်ခံပြီး နော်ဝေလက်ရွေးစင်အသင်း ကိုယ်စားပြုကစားဖို့ ရွေးချယ်ခဲ့ပါတယ်။
၎င်းဟာ အသက် ၁၉ နှစ်အရွယ်မှာ နော်ဝေလက်ရွေးစင်အဖြစ် စတင်ကစားခွင့်ရခဲ့ပြီး ပြိုင်ပွဲစုံ ၄၃ ပွဲကစား၊ ၄၂ ဂိုးသွင်းယူကာ အသင်းသမိုင်းတစ်လျှောက် ဂိုးအများဆုံးကစားသမားအဖြစ် စံချိန်တင်ထားသလို ဒုတိယအသင်းခေါင်းဆောင်အဖြစ် ခန့်အပ်ခံထားရပါတယ်။
အခု ပြောင်းလဲဝတ်ဆင်မယ့် နာမည်အသစ်ကို မန်စီးတီးအသင်းမှာ ဝတ်ဆင်ခြင်းရှိမရှိကိုတော့ မသိရသေးပါဘူး။
