အာဂျင်တီးနားအသင်းခေါင်းဆောင် တိုက်စစ်မှူး မက်ဆီက စက်တင်ဘာလအတွင်း ယှဉ်ပြိုင်ရမယ့် ကမ္ဘာ့ဖလားခြေစစ်ပွဲတွေဟာ မိမိအတွက် နောက်ဆုံးကမ္ဘာ့ဖလားခြေစစ်ပွဲတွေ ဖြစ်တာကြောင့် အလွန်ထူးခြားလိမ့်မယ်လို့ ညွှန်းဆိုခဲ့ပါတယ်။
အသက်(၃၈)နှစ်ရှိပြီဖြစ်တဲ့ မက်ဆီက ကစားသမားဘဝက ဘယ်တော့အနားယူမလဲဆိုတာ အတည်မပြုသေးပေမဲ့ နောက်ထပ် ကမ္ဘာ့ဖလားခြေစစ်ပွဲ ယှဉ်ပြိုင်တော့မှာမဟုတ်ဘူးလို့ အတည်ပြုလိုက်သလိုတော့ ဖြစ်သွားခဲ့ပါတယ်။
တောင်အမေရိကဇုန်ရဲ့ ၂၀၂၆ ကမ္ဘာ့ဖလားခြေစစ်ပွဲတွေဟာ စက်တင်ဘာလအတွင်း အဆုံးသတ်တော့မှာဖြစ်ပြီး အာဂျင်တီးနားအသင်းက ပွဲမကုန်ခင်မှာကတည်းက ခြေစစ်ပွဲအောင်မြင်ထားပြီးသားပါ။
အာဂျင်တီးနားအသင်းဟာ စက်တင်ဘာ(၄)မှာ ဗင်နီဇွဲလားနဲ့ အိမ်ကွင်း၊ စက်တင်ဘာ(၉)မှာ အီကွေဒေါနဲ့ အဝေးကွင်း ယှဉ်ပြိုင်ကစားရမှာဖြစ်ပြီး မက်ဆီရဲ့ နောက်ဆုံးအိမ်ကွင်းကမ္ဘာ့ဖလားခြေစစ်ပွဲဖြစ်တဲ့ ဗင်နီဇွဲလားနဲ့ပွဲကို အာဂျင်တီးနားဘောလုံးအဖွဲ့ချုပ်က လက်မှတ်စျေးနှုန်း မြှင့်တင်ဖို့ ကြိုးစားနေကြောင်း သိရပါတယ်။
ဗင်နီဇွဲလားနဲ့ပွဲအပေါ် မက်ဆီက ”ကျွန်တော့်အတွက် အလွန့်အလွန်ထူးခြားတဲ့ပွဲ ဖြစ်လာမှာပါ။ ဘာကြောင့်လဲဆိုတော့ နောက်ဆုံးကမ္ဘာ့ဖလားခြေစစ်ပွဲဖြစ်တာကြောင့်ပါ။ ဒါကြောင့် ကျွန်တော့်မိသားစုက အဲဒီမှာ ကျွန်တော်နဲ့အတူ ရှိပါလိမ့်မယ်။ ကျွန်တော့်ဇနီး၊ ကျွန်တော့်ကလေးတွေ၊ ကျွန်တော့်မိဘတွေနဲ့ ကျွန်တော့်ညီအစ်ကိုမောင်နှမတွေပါ” လို့ ပြောကြားခဲ့ပါတယ်။
